بسم الله الرحمن الرحيم

تمر على الإنسان مواقف عديدة في حياته اليومية منها ما يضحك ومنها ما يبكي وقد يظل لأيام يتذكرها لكن ما سأرويه لكم من مواقف أظن أنه من المستحيل أن أنساها وإليكم السرد:

- هذه قصة قديمة حصلت لي في الإبتدائية وفيها مثال على تربسة العقل أحيانا وفيها أننا – أنا والعائلة الكريمة – كنا رايحين نتمشى على البحر فمن شدة اللهفة قررت أنزل قبل أهلي من البيت فشافني الوالد وأعطاني تيرموس شاي – أو ثلاجة الشاهي بالمكاوي – وقلي أنزل حطها في السيارة وتأكد إنها مغلقة جيدا على أساس ما تنكب. المهم أنا ما كذبت خبر نزلت ولما جيت أحط التيرموس قلت في بالي خليني أجرب لا يكون الغطاء مو مقفول مزبوط – وعندها اشتغل الغباء – ومسكت الثلاجة بيد وحطيت اليد الثانية تحت وجربت أصب من الثلاجة وكانت المصيبة !!! الثلاجة مفتوحة !!! وصبيت الشاي الحار على يدي وأتوقع إنكم تعرفوا الباقي. لكن اللي ما تعرفوه إني ما كنت فاهم أيش الخطأ اللي أنا عملته وكنت مستغرب ليش يدي انحرقت حتى جاني الوالد وقلي: أشبك أيش اللي حصل؟ قلت له : جربت الثلاجة وطلعت مفتوحة. قال لي: وليش صبيتها على يدك يا أبله؟؟؟. وقتها بس انتبهت إنو ما كان في لزمة أحط يدي تحت التيرموس. من جد تربس مخي.

- في يوم من الأيام كنت أخذ قيلولتي أنا وأحدى أخواتي في – العصرية – وفجاءة ودون سابق إنذار سمعت صوت مزعج من المنبه تبع الساعة. ولأنني كنت في سابع نومه طار عقلي من الصوت ورحت أدور وأبحث عن الساعة اللعينة عشان أسكتها وما دريت بنفسي إلا وأنا ماسكها وأدور الإزرار تبع الجرس وقمت أضغط على أي شي فيها والصوت مو راضي يسكت قمت ضربتها بيدي على أساس تنكتم لكن مافي فايدة ففقدت أعصابي وجلست ألطم فيها أشكال ألوان وفي هذه اللحظات قامت أختي من النوم وقالت : هاتها أنا أقفلها !!! وحاولت أختي ومافي فايدة رجعت أعطتني إياها وأنا أحاول وأحاول وفجأة ….. قالت أختي : سيبها خلاص فرفعت عيني وهممت بالزعيق. لكن شفت الساعة في يدها وسكت الصوت. طالعت وقتها على اللي في يدي لقيته (المسجل) يعني كل هذا الضرب كان في المسجل المسكين اللي ما سوى شي. من جد النوم سلطان.