بسم الله الرحمن الرحيم

هذا هو الجزء الثاني للمواقف المضحكة التي مرت علي أتمنى أن تنال رضاكم:

– هذه قصة ما حضرتها لكن حصلت مع الوالد وعندها كنا في مدينة الرياض وكان الوالد عنده – شبشب – أو نعال – أكرمكم الله – وانقطع فقرر إنه يشتري واحد ثاني. ولأنه كان مو فاضي دخل أول محل في وجهه وشكلو كان محل فخفخة فشاف شبشب وسأل عن سعره قام البايع المحترم وقال له إن سعره 1200 ريال – وهذا سعر في عرف الوالد يعتبر من الموبقات – فسأله الوالد: ليش قد كده غالي؟ قال له البايع: هذا المداس مصنوع من جلد النعام!!!! وايق – بمعنى نظر- الوالد إليه وقال في نفسه: وربي لو مصنوع من جلدك ما أشتريه بهذا السعر وترك المحل وخرج.

– هذه قصة أخر وناسة حصلت معي في فرنسا أنا وأحد أصدقائي كنا في مطعم بيتزا وكان الوقت أخر الليل ولما دخلنا المحل حاولنا نكلم البائعة بالإنجليزي فتقول sorry no English حاولنا نفهمها طلبنا من الصور وما صدقنا فهمت لكن كنا ما نبغاها تحط لحم في البيتزا فحاولنا وحاولنا ومافي فايدة مو راضية تفهم بس فجأة دخل علينا شخص مسؤول عن التوصيل وشاف أشكالنا عرب وشاف حالتنا معاها ففهم القصة ولحسن الحظ كان أصله عربي (جزائري) فتكلم معانا بالعربي وفهم طلبنا وترجم لها الطلب ووقف يتكلم معانا وطلع إن والده كان عايش في السعودية وإنه هو كمان عاش 5 سنين في السعودية – ومن أطرف ما قاله إنه ما وحشو شي في السعودية أكثر من بروست البيك – المهم جلسنا نهرج معاه ما يقرب من ربع ساعة وكل الكلام بالعربي وبعدها جاه طلب وقال لنا لازم أروح وسلم علينا ومشي ووقفنا أنا وصاحبي ننتظر طلبنا ولما أخذنا البيتزا تذكرنا إنه لازم نجيب فاتورة عشان الشركة تحاسبنا على العشاء فرجعنا مرة ثانية لنفس الموال – كيف نفهمها إننا نبغى الفاتورة؟؟- جلست أقلها كل الكلمات اللي تخطر على البال invoice – bell – paper – receipt وبرضو مافي فايدة وفجأة وبدون سابق إنذار سمعت صاحبي يقلها فاتورة. لا أخفيكم نويت وقتها أديله كف على وجهه وأخرج حرتي فيه لكن الموظفة الموقرة فاجأتني أكثر وقالت: أووه فااتووووورة !!! طالعت فيها بكل استغراب وقلت لها إنت تعرفي تتكلمي عربي؟؟؟؟ قالت: شوية. قلت حسبي الله ونعم الوكيل وتاركتنا نفحط من ساعة. الله لا يبارك في إبليسك. وجلست أضحك على هذا الموقف حتى وصلنا الفندق وحكينا للشباب اللي ماتوا ضحك علينا.